好想記錄低生兩個寶貝既感覺，我怕隨年月既逝去會慢慢唔記得。 2018年10月每日探體溫都唔希望有下跌，每日數住第幾日第幾日，原本想放棄，因為失望左太多次，唔敢買驗孕棒確認，直到連續3個星期有多高溫下買驗孕棒確認有左糯米豬，完全唔敢相信自己既眼睛，我期待左好耐既兩條線。簡直係又興奮，又唔真實。 係第二朝一早，叫老公打開個櫃拎野，佢見到枝棒都未黎得切有反應，呆左幾秒問我係咪真架。剛懷孕咩都唔識，去左診所驗完拎轉介信預約政府產前檢查。2018年11月至2019年5月每個月都有一次檢查：1.預約新症，抽血2.12週前超聲波度頸皮3.12至15週糖水測試第一次（唔係每個人需要）4.二十幾週照結構5.24至28週第二次糖水測試6.38週驗乙型鏈球菌係陀糯米豬時，冇任何妊娠反應，所以感覺好唔真實，直至去到廿五週先微微感覺到胎動。 當確定我患有妊娠糖尿時，每個星期要篤3次手指，要跟營養師餐單，簡直係擔心影響左bb.幸好我係邊界，控制飲食上唔錯，bb生長線ok.只係我之後既產檢都變左見醫生而唔係助產士。 到左5月31日朝早9點35分左右，一早就感覺有便意，好想2去廁所但去唔出（我好少會咁）。每隔3至5分鐘就痛一次，奶奶同老公都覺得我係陣痛，叫我準備去醫院。我沖好涼，準備好，慢慢行落樓，仍然係3至5分鐘痛一次。奶奶車左我同老公去醫院登記。一去到老公登記，我做檢查。姑娘幫我量血壓，叫我換病人衫，仲有檢查開左幾指等等。 我約11，12時左右入院，當時開左兩指。個個人都同老公講話有排等，起碼要捱頭24小時先，所以我都預左要啲時間。陣痛對我黎講都係可忍受既痛，不過就坐又唔係企又唔係，姑娘好好人，我老公入黎幫我鬆下條腰，原本佢只可探病時間入黎。到左3，4點真係痛多左，但未穿水又未見紅，所以我繼續努力un波，老公話見到我有少少紅，姑娘黎檢查時已有5指，即刻用輪椅推我去產房。老公換好衫入黎陪我，有笑氣聞但一開始唔適運用，有時吸到有時吸唔到，慢慢識用就好好多。 到左7點幾8點，姑娘檢查時希望我可以自己穿水，唔駛佢地幫，一邊同我講就生得，忍多陣。過左無幾耐，真係自己穿到水，助產士就話開始生，唔俾我再聞笑氣。實習醫生幫我種豆，篤到手都腫埋5個針口位先篤到，用左約半小時，不斷係陣痛時用力生。聽住指令幾時吸幾時呼，到差不多時候幫我剪，就咁生左呀仔出黎。聽到一出黎自己識喊，姑娘放左佢係我心口。望到佢第一眼，老公感動流淚，自己覺得生左個老公迷你版，有種媽咪同我形容覺得自己生左個人仔好勁。 陀左38週1，冇妊娠紋，冇嘔，冇行動不便，陣痛用左10至11小時，生產半小時，終於9點14分見到你真人喇！呢個重3kg同長49.5厘米既小嬰孩，符合小朋友出世既理想磅數。醫院安排了很好既位置，與小孩在醫院獨處既48小時（唔計探bb時間），感覺還不真實。生完兩小時唔夠已經行得走得，十分精神。自己可以去到廁所，第一次成隻手插左落去呀仔啲屎到。第一次幫bb換片，第一次餵奶，第一次抱佢，第一次氹訓教（雖然佢好乖食完就訓訓完食再訓），隔離床個啲喊到勁大聲，呀仔都可以係咁訓，真西利。 出左院之後，要約期去健康院檢查，呀仔黃疸指數唔合格，要留院觀察，心都碎埋，見到佢係個燈箱入面，又怕佢喊冇人理佢，又唔想佢食奶粉但自己又未上到奶，當時真係好唔開心，但係又冇辦法。 第二朝一早飛奔去睇個仔，幸好指數本身唔超得太多，所以照左一日就出得院，但明顯喊到把聲沙左咁返屋企。呀仔其實都真係好錫我，有佢真係好感恩，佢有好多唔同方面都好照顧我，陀住係肚到既時候完全唔覺自己係陀緊小朋友，生既時候都係用左接近12個小時，乖乖平安咁黎到呢個世界。雖然從來冇人同我講過生完之後原來有個傷口係下面，坐既時候要用個有窿既水泡，如果唔係會好痛。幸運既係我除左餵奶之外，有家人幫手照顧小朋友沖涼，換片，氹訓教，洗奶泵奶樽等等既雜項，所以我唔駛掂到咁多水，唔駛怕入風老左後會有風濕。 2020年2月至10月到左約4個月左右開始黎返月經，之後就二胎會同糯米豬唔差得遠，所以繼續努力做人。今次有糯米豬，心情比較放鬆，大家都抱住有就有冇就冇既心態，所以好快係心情輕鬆下就有左超音鼠。我估自己又有左既原因係糯米豬唔肯再埋身食，我想2月14情人節俾驚喜老公，所以2月13就買左驗孕棒驗。果真見到熟識既兩條線，開心到飛起，準備放返入房包好佢想當禮物送俾佢做情人節禮物，點知老公無啦啦爬起身去廁所，一手就禁左落去枝驗孕棒到，今次有左經驗，好快就回過神來。有二胎當然好開心，最緊張等T21報告，知道係女時，個種開心興奮既心情真係好難形容，只係知道好想快啲見到妹妹。妹妹帶俾我既妊娠反應都唔算多，一直都同哥哥差不多，係到36週時我有妊娠濕疹，痕到傻左，體驗到有濕疹既人平時好辛苦。我地用土銀花沖身加食健脾益胃既野，好快痕左一個星期左右就冇再生新既位置，我全雙腳都係濕疹遺留下來既印。 呢胎當然都係要篤手指，同上胎一樣懷孕時患有妊娠糖尿。呀妹遲遲未出黎，所以醫院約左催生期俾我。我每日都同妹妹講快啲出黎，唔好逾期居留，我好怕要塞藥催生。結果妹妹係預產期後兩個鐘終於肯俾訊號我地。凌晨兩點半感到痛，然後去廁所上左個大號，諗住返去訓，點知都仲係隔3分鐘就痛，同老公講應該係陣痛喇，但我仲想訓多陣先出發。老公話唔好喇，二胎怕好快就出黎，所以我去沖左個涼，再由奶奶車我地上去醫院。 差不多4點我先入去檢查，老公就去醫院登記。檢查未開始時已經痛到唔係好行到，上到床時姑娘話已經開左兩指，換完病人衫量血壓，升得好高，姑娘同登就完返黎既老公講你唔好走喇，你太太就生，其他同時入院既反而要返屋企等，因為新冠肺炎既問題，所以唔可以係醫院逗留。我慶幸既係肺炎問題稍為緩和，所以醫院恢復陪產，因為我生完無幾耐又再停陪產。搏左心機，約5點就推左我去產房，我勁開心有得聞笑氣，姑娘再檢查時我已經係開左8度，所以唔俾我聞笑氣，話準備要生喇，生左約半小時終於係58分出左黎。啲姑娘都話我好勁順產，因為妹妹唔算輕，連傷口都冇，真係好好彩。 妹妹重3.81kg長53cm,感恩係40週1迎接妹妹，大家一起身就被通知我已經生左。妹妹既重量，所以姑娘要幫佢度血糖，而因紅假，醫生唔俾妹妹出院，要妹妹照燈，肯定佢既黃唔影響生長。同哥哥一樣，留左一晚就出院，都好叻女架喇。咁細個又要睇住佢抽血，雖然知道檢查肯定佢冇任何問題，但心都會好痛，幸好 健健康康。 照片來源：天娜

終於等到所有野都好似安排好，停低落黎抖一抖，更新一下網誌。 原本10月21係妹妹既預產期，10月20見完醫生，佢話如果bb唔出黎就約左10月30號入院催生，聽聞催生會比正常痛多好幾倍。當然有得揀我係唔會想催生，但妹妹睇黎住得好舒服，完全冇諗住要出黎～ 10月21過左，準備上床訓教。到左10月22既凌晨兩點半我痛醒左，感覺同呀仔要生時既痛一樣,但我想去下廁所睇下係咪去得出，去完諗住想返房訓多陣先再算，因為上次痛左10個鐘左右先生，諗住係醫院痛不如係屋企痛。但老公唔比，因為佢聽人講第二胎會快好多，所以要我起身去沖涼，吹完頭就叫醒奶奶車我地去瑪麗醫院辦入院手續。我地到醫院時係凌晨3點40分左右，老公登記入院，我打左個電話比媽咪話佢知我入院喇，再比姑娘檢查。姑娘問我急唔急，我話都急急地，佢一黎就同我檢查先再度血壓，一檢查已經話我開左兩度，同呀仔個時一樣。我換左病人衫，量血壓時姑娘話太高，搏左心機聽bb心跳又話bb心跳減慢，我其實已經痛到好難郁，好努力咁要自己清醒。老公返黎後，姑娘話你太太好快生得，叫佢留醫院等，因為疫情所有人都會被趕返家。當時4位同時登記既只有老公留低，其他都要返家。 到左凌晨4點尾推左我入產房，叫老公換左衫，一入到去唔駛佢講我就已經識吸笑氣，即刻舒緩好多，檢查完開左8度，準備隨時生得。冇幾耐，佢唔俾我聞笑氣，個下真係覺得晴天霹靂，因為聞左唔係好耐，一拎開就痛得好辛苦。姑娘話穿左水，可以生得，係咁叫我屙，我好努力聽指示，但我真係好想訓教，眼睛都就黎睜唔開，老公叫我頂住，聽指示用力再用力。 終於係05：58妹妹出世喇。 姑娘都覺得好驚訝我生左個8磅幾既小朋友順產仲要冇傷口。我都好感謝接生既姑娘好有經驗。人地話生仔10級痛，但我都仲忍受得到既，係真係好痛，不過呢一對仔女算係好錫我。呀仔係第一胎，用左接近12個小時痛連生，順產，算係快。呀妹第二胎，用左接近3個半小時痛連生，順產，超快。 好感恩佢地兩個平安同健康，冇咩太多大問題出現，呢個係我一直希望既，只要健康，自然人生會有更多唔同既選擇可以揀～ 唔好問我仲會唔會再生，答案係唔會。已經有一仔一女我已經好足夠，接落黎好好培養佢地大個，望佢地健康開心快樂成長，做一個正值既人。 照片來源：Tina

突然好想食梳乎厘，但又唔願自己整，依家出街食又驚危險，所以唯有叫老公去整。 將牛油和牛奶放入小鍋內，以小火加熱至微滾，備用。 把15克糖加入蛋黃中，打發均勻，續少加入牛奶攪勻。 將蛋液倒回小鍋，以小火煮至微稠細滑（吉士狀），盛起備用。 用電動打蛋器將蛋白打至起泡，續小加入15克糖打至企身，再加入雲尼拿香油，拌勻。 將少量蛋白加入蛋黃混合物中，輕輕拌勻，再加入其餘蛋白，輕輕拌勻，以免壓走氣泡。 呢一個係所需食譜，當然老公係住食既新手，所需預備時間當然比較長，不過唔緊要，最重要係有得食，賣相又唔差。 由於時間關係，梳乎厘已經被我食左落肚了。

T 什麼是愛情?我也不清楚，對我而言，要求很簡單，只要一起開心那便是愛情。但是我發覺，愛情隨著年紀和時間不同而改變。 在17,18歲的我，覺得大家一起開心，每天笑哈哈的過，這便是愛情。在年青的時候，我不會控制對男朋友的情緒，只有一有不開心，都會發洩在他身上，他是一個不太表達嬲怒情緒的一個人，不會跟我吵架，所以永遠都是硬食了我發脾氣。我以為這是愛情，但在跟媽媽分享時，她跟我說我們的愛情不會長久，因為我不懂什麼是愛情。在回想起那5年，我感謝有他的出現和照顧，我不是一個好的女朋友，但他令我明白到如果我是被發脾氣的一方會是什麼感受。 在22,23歲遇到了另一個脾氣與我相近的。雖然我們只在一起一年，但那也是我成長的一年。我們沒有吵架，會溝通，但可惜沒有未來的。

T 不能不佩服小朋友的學習能力，他們就像一張白紙，你教他們什麼，他們便學什麼。 我家的小寶貝十分可愛(在自己媽媽眼中的孩子都是最好的)，他爬起來很像一條蟲，用飛快的速度在地上滑行，最喜歡看自己的手指，懂得做拜拜、點蟲蟲、拍手等等的簡單動作。看見他每天的成長，確實是令我工作的動力，無論多累，也會抱他、跟他說故事、唱歌、玩遊戲等…